İşğal etilgen Qırımnıñ Canköy sakinleri saba patlav seslerini eşitti, Rusiye akimiyeti bu aqta bildirmey, dep haber etti Ukrayına prezidentiniñ Qırım Muhtar Cumhuriyetindeki temsilcisiniñ muavini Denis Çistikov Ukrayına Radio NV yayınında.
«Saba Canköyde telâş bar edi. Yerli sakinler bu rayonda bir çoq patlav oldı, dep ayta, işğalci memuriyet ise bir şey bildirmey. Qırım sakinleriniñ bir çoqu taşımacılıq yapa. Tuvğanları qasevetlenip başladı, aydavcılarnen bağlanıp olamaylar ve insanlar memuriyetniñ areketlerine açuvlana», — dep bildirdi temsilci muavini.
Çistikov Çonğar köprüne yapılğan darbelerni izaatlap, Dnipronıñ sağ tarafınıñ azat etilüvi başlağan Antonov köpründeki vaziyetni añdıra, dep bildirdi. «Rusiye arbiylerini telâşlandırğan belli assotsiatsiyalar», — dep qayd etti Çistikov.
İyünniñ 22-nde saba işğal etilgen Ukrayına topraqlarınıñ Rusiye akimiyeti Çonğar köprüne ateş açıldı, dep bildirdi. Rusiyeliler tayin etken Herson vilâyetiniñ işğal altındaki qısmınıñ yolbaşçısı Vladimir Saldo aytqanına köre, Çonğar köprüne Storm Shadow raketalarından ateş açıldı.
Qırımnıñ Rusiye akimiyeti Çonğar yönelişinden areketni Ermeni Bazar ve Perekop keçiş noqtalarına aylandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
