Yuqarı Rada reisi Andriy Parubiy Ukraina prezidenti Volodımır Zelenskıynıñ parlamentni dağıtmaq qararı Anayasa mahkemesinde şikâyet etilecek, dep bildirdi. Bu aqta Azatlıq Radiosı haber ete.
«Kederli ve telâşlı bir şey, Ukraina Anayasasınıñ Kefili öz faaliyetini Anayasanı qaba bir şekilde bozıp başlay. Yaramay bir işaret», – dep yazdı Parubiy Facebook ağında.
Parlament reisi tefsir qaldırğanlardan biriniñ «Anayasa bozuluvı Anayasa mahkemesinde şikâyet etilecekmi» sualine «ebet» dep cevap berdi.
Prezidentniñ saytında mayısnıñ 21-nde Ukraina Yuqarı Radasını dağıtuv buyruğı derc etilgen ve nevbetten tış parlament saylavlarınıñ keçirilmesi iyülniñ 21-ne belgilendi.
Ukraina Anayasasına köre, nevbetten tış parlament saylavları Ukraina Yuqarı Radasınıñ vekâletleri vaqtından evel toqtatılğanına dair qarar derc etilgeninden 60 kün içinde keçirile.
Qanun boyunca nevbetteki parlament saylavları 2019 senesi oktâbrniñ 27-nde ötkerilmeli.
