Ukrayina prezidentiniñ Qırım MC-deki daimiy temsilcisi Tamila Taşeva Qırım.Aqiqatqa Halqara "Qırım platforması"nıñ 1-nci Parlament sammitiniñ keçirilmesiniñ hususiyetleriniñ neden ibaret olğanını añlattı.
"Qırım platforması" bir qaç seviyede çalışa. Birincisi, ükümet ve devlet başları seviyesidir. Ekincisi, parlametler seviyesidir. Üçüncisi ise ekspertler seviyesidir. Keçken sene biz ekspertler seviyesini keçirgen edik, anda "Qırım platforması" çerçivesinde, şu cümleden ükümet ve devlet başları seviyesinde panel muzakereleri keçirildi. Bu sene Horvatiya tarafınıñ sayeisinde biz ilk sefer "Qırım platforması"nıñ Parlament seviyesini keçiremiz", - dedi Taşeva.
Tamila Taşevanıñ sözlerine köre, "Qırım platforması" sammitiniñ memleketlerniñ parlamentleri seviyesinde keçirilmesi "Qırım platforması" iştirakçileri tarafından azırlanğan kararlarnıñ ombrge keçirilmesine imkân berecek.
"Parlamentler seviyesi artıq kerçekleştirüvdir. Siyasiy seviyede, ükümetler ve devlet başları tarafından qabul etilgen qararlar er alda qanun teşebbüsleri vastasınen parlamentler tarafından ömürge keçirile. Türlü parlamentlerniñ temsilcileri bir yerde Qırım ile bağlı meselelerni muzakere etip olğan zaman parlametlerara munasebetler pek müimdir", - dey prezident temsilcisi.
Sammit Ukrayina ve cenkten soñraki quruluvında tecribesi olğan Horvatiya ile bereber teşkil etilgen.
Oktâbrniñ 24-nde Horvatiyada "Qırım platforması"nıñ 1-nci Parlament sammiti öz işini başladı. Sammit eki kün devam etecek. Birinci kün Qırımnıñ işğalden azat etilmesinden soñ reintegratsiyası meselelerine, keçüv adliye ve Rusiyeniñ halqara cinayetleri içün mesüliyetke çekilmesi aqqında munaqaşalarğa bağışlanğan.
Avgustnıñ 23-nde bu yıl Rusiyeniñ Ukrayınağa qarşı büyük istilâsından soñ online şekilde «Qırım platformasınıñ» ekinci sammiti keçirildi.
Ukrayina prezidenti Volodımır Zelenskıy «Qırım platforması» sammitini açıp, qırımlılarğa Ukrayina akimiyeti Qırımğa «kesen-kes qaytacaq», dep ayttı.
«Qırım platforması» – Ukrayinanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayinağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
