Parijde «normand dördü» memleketleri liderleriniñ körüşüvi vaqtında imzalanğan vesiqa «qırımlı siyasiy mabüslerni deñişimden alıp taşlay». Böyle fikirni dekabrniñ 10-nda Qırımtatar Milliy Meclisiniñ reisi Refat Çubarov Kyivde «Milliy aq qorçalayıcı konferentsiyasıDegil» tedbirinde bildirdi, dep haber ete Qırım.Aqiqat mühbiri.
«Tünevin imzalanğan (Parijdeki körüşüv neticesinde – QA) vesiqa bütün qırımlı siyasiy mabüslerni deñişimden alıp taşlay. Muzakereler keçirilgenini bilem, tırışqanlarını bilem, amma yüzlernen insannıñ duyğularına baqıp, onı imzalamağa kerek edimi? Qırımdan 100-den çoq siyasiy mabüs bar – olarnıñ tuvğanları, bala, apay, ana-babaları bar. Yüzlernen insan», – dedi Çubarov.
Parijde dekabrniñ 9-nda aqşam Ukraina, Rusiye, Frenkistan ve Almaniya liderleriniñ körüşüvi olıp keçti. Ukraina prezidenti Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin ile eki taraflı körüşüvler keçirdi.
Ukraina prezidenti, Parijde keçirilgen «normand formatı» körüşüvinden soñ keçirilgen matbuat konferentsiyasında çıqışta bulunıp, Ukraina ve onıñ halqı içün deñişmeycek esaslarnı qayd etti. O, Donbas, Rusiye işğal etken Qırım Ukraina toprağı ola, dep qayd etti.
«Normand dördü» liderleriniñ soñki muzakereleri 2016 senesi oktâbrniñ 19-nda Almaniyanıñ paytahtı Berlinde keçirilgen edi. O vaqıt Ukraina prezidenti olğan Petro Poroşenko, Frenkistan prezidenti Fransua Olland, Rusiye prezidenti Vladimir Putin ve Almaniya kantsleri Angela Merkel Lugansk vilâyetiniñ Stanıtsâ Luğanska ve Zolote ve Donetsk vilâyetiniñ Petrovske rayonlarında ordularnıñ çetleşüvi aqqında añlaşqan ediler. Bu vazifeler 2019 senesiniñ yaz – küz mevsimleri arasında yerine ketirildi.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.
BM malümatına köre, 2019 senesi oktâbrniñ 31-ne qadar silâlı zıddiyet neticesinde Donbasta 13000 - 13200 insan elâk oldı.
