Parijde Ukraina prezidenti Volodımır Zelenskıy ve Rusiye prezidenti Vladimir Putinniñ eki taraflı körüşüvi yekünlendi.
Bu aqta Ukraina prezidentiniñ matbuat kâtibi Yuliya Mendel Twitterde bildirdi.
Ukraina prezidenti ofisiniñ Facebook saifesinde haber etilgenine köre, şimdi «muzakereler iş yemegi çerçivesinde «dört» formatına qayttı».
Bundan evel «normand dördüniñ» muzakerelerinde Zelenskıy ve Putinniñ körüşüvi içün teneffüs berilgen edi.
Parijde dekabrniñ 9-nda aqşam Ukraina, Rusiye, Frenkistan ve Almaniya liderleriniñ körüşüvi başlandı.
Ukraina prezidenti Volodımır Zelenskıy, Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin Yelisey sarayında dört taraflı muzakerelerni keçireler.
Aynı vaqıtta, Ukraina prezidentiniñ ofisi ögünde tünevinden berli aktsiya keçirile. Onıñ iştirakçileri Volodımır Zelenskıyden «Ukrainanıñ teslim» adımlarını atmamağa ve Kreml ile Donbastaki Rusiye gibrid quvetleriniñ qanunlaştırıluvınen bağlı uzlaşuvğa razı olmamağa çağıra.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.
BM malümatına köre, 2019 senesi oktâbrniñ 31-ne qadar silâlı zıddiyet neticesinde Donbasta 13000 - 13200 insan elâk oldı.
