Avgustnıñ 19-nda saba Aqyarda eki yañı COVID-19 hastası qayd etildi, bir kişi vefat etti, dep bildire şeerniñ Rusiye ükümeti.
«Eki hasta da para qazanmağa kelgen. Diagnozı tasdıqlanğan daa bir insan vefat etti. Bu adam 71 yaşında edi. Hastalıqtan ğayrı hronik hastalığı bar edi, ağır virus pnevmoniyası oldı», – dep aytıla haberde.
Yerli akimiyetniñ malümatına köre, al-azırda 65 insan hastahanede buluna. 175 kişi yuqunç hastahanesinde közetile, 151 insan №9 şeer hastahanesinde qala. 281 insan yaşağan yerde közetile.
Yılnıñ başından Aqyarda 435 insan koronavirus yuqunçına oğradı, 342 kişi yahşı oldı, 14 kişi vefat etti.
Keçken künü Qırımda 13 koronavirus hastası qayd etildi. Qırımda, yerli akimiyetniñ malümatına köre, 1833 yañı koronavirus hastası qayd etildi, 83-ü çetelden keldi, 115-i qomşu Rusiyeden kelgenler ve olarnen alâqada olğanlar, 1275 insan tüzeldi, 23 kişi koronavirustan vefat etti. Aqyarda 433 insan yañı koronavirus yuqunçına oğradı, 341 insan yahşı oldı, 13 kişi vefat etti.
Qırımdaki Rospotrebnadzor idaresiniñ reberi Natalya Penkovskayanıñ malümatına köre, Qırımda artqan koronavirus hastalarınıñ sayısı çoq degil.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
