Keçken künü Qırımda 7 hasta koronavirus yuqunçından öldi, dep haber etile Qırımnıñ Rusiye sağlıq nazirliginiñ er künlik monitoring malümatında. Berilgen malümatqa köre pandemiya vaqtında COVID-19-dan vefat etkenlerniñ umumiy sayısı 451 oldı.
"3580 insan (covid) ambulator tedaviylevde, 2918 kişi (covid ve pnevmoniya) hastahanede buluna, 27 insan observatorlarğa alındı. Umumen (pandemiya vaqtında –QA) 22818 COVID-19 hastası qayd etildi. Tedaviylengen 17360 insan çıqarıldı", – dep haber ete müessise.
Tünevin Qırımda sekiz hasta koronavirustan vefat etti.
Rospotrebnadzor Qırımda COVID-19, gripp ve keskin nefes virus yuqunçı (KNVY) hastalarınıñ sayısı artqanını bildire. Eñ çoq koronavirus hastası Yalta, Aluşta ve Aqmescitte.
Prezident Vladimir Putinniñ avalesinen Rusiye Mudafaa nazirligi Yalta ve Aqmescitte koronavirus gospitalerini yerleştirecek.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
