Rusiye kontrolindeki Qırım Sağlıq nazirligi koronavirustan vefat etken daa bir hasta aqqında bildire. Bu sentâbrniñ 1-nde Qırım müessisesiniñ keçken kününiñ COVID-19 vaziyetine dair derc etken malümatında bar.
Böylece, Qırımda bu yuqunçtan can bergenlerniñ sayısı 31 oldı.
«1230 insan tibbiy közetüv altında buluna, 12-si evde dinamik közetüv altında qala, 1056 insan hastahanede buluna, 162 kişi observatorlarğa alındı», – dep aytıla Qırım Sağlıq nazirliginiñ malümatında.
Müessise bildirgenine köre, 751 insan Qırımnıñ tibbiy müessiselerinde tedaviylene, 1695 insan tüzelgen soñ çıqarıldı.
Keçken aylarda Qırımda bir künde qayd etilgen koronavirus hastalarınıñ sayısında altı kere rekord qayd etilgen edi, eñ çoq hasta (84) avgustnıñ 27-nde oldı. Qırımda koronavirus hastalarınıñ sayısı eñ yüksek raqamlarda sentâbrniñ ortasına qadar olacaq, dep bekleyler.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
