Çarşenbe künü, iyünniñ 23-nde, Avropa Şurası Parlament Assambleyası musaviylik ve diskriminatsiyağa qarşı komiteti işğal etilgen Qırımda qırımtatarlarnıñ aqlarınıñ qorunmasına dair qararğa Ukrainanıñ teklif etken tüzetmelerniñ çoqunı qabul etti. Bunı öz Facebook saifesinde PACE-deki daimiy delegatsiya azasınıñ muavini Yevgeniya Kravçuk haber etti.
«Bu tüzetmeler qaranı daa da sertleştire, Rusiye işğalci organları tarafından yapılğan siyasiy taqiplerniñ siyasiy sebeplerini añlata, diniy sebeplerden taqiplerge diqqat çeke», – dep yazıla bildirmede.
Kravçuknıñ bildirgenine köre, rey berilgen soñ qararnıñ adı deñişecek.
«Bitaraf «Qırımtatalrlar ile bağlı vaziyet»ten daa qattı «Qırımtatarlarğa qarşı yapılğan insan aqlarınıñ bozuluvı»na», – dep yazdı o.
İyünniñ 21-nde, bazarertesi künü, Avropa Şurası Parlament Assambleyasınıñ yaz sessiyası başlana. Kün tertibinde – Rusiye işğal etken Qırımda qırımtatar halqınıñ aqlarınıñ qorunmasına dair qarar.
Ukrainanıñ delegatsiyası, Rusiye bu qararğa müsbet rey bermesiniñ qarşısını alacağını bekley.
«Qararnıñ baqılması başqa vaqıtqa qaldırılmaması biz içün pek müim edi. Bu mevzuğa qaytmaq müim bir ğalebedir, çünki Qırımdaki işğal organlar tarafından qırımtatarlarnıñ aqlarınıñ bozulması alâ daa devam ete, adamlarnıñ qoruv ve adaletke ihtiyacı bar. Rusiye delegatsiyası müsbet rey berilmesine keder etecegini bekleymiz», – dep yazdı Facebookta PACE-deki daimiy temsilcilikniñ azasınıñ muavini Yevgeniya Kravçuk.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
