Avropa Şurası Parlament Assambleyası Rusiye Devlet Dumasınıñ deputatlar eyyetiniñ vekâletlerine qoltuttı. Bu qararğa 96 delegat rey berdi, dep haber ete Azatlıq Radiosı.
Qararnı Felemenk deputatı Toni Koks azırladı. Qararğa köre, Rusiye PACEge sıñırlarsız qayta. Koks belli ilerilev olğanını qayd ete: Moskva Avropa Şurasına ücret töledi ve ukrainalı arbiy deñizcilerni azat etti.
Aynı vaqıtta PACE Rusiyege Assambleyanıñ Qırım işğalinen bağlı baqışı aqqında hatırlatqan qarar metniniñ tüzetüvine qoltuttı.
Yanvarniñ 28-nde PACE monitoring komiteti Rusiye eyyetiniñ vekâletlerine rey berdi. Bunıñ ögüne Latviya ve Litvaniya parlamentleriniñ vekilleri PACEdeki Rusiye vekâletlerine itiraz bildirdi.
Avropa Şurası Parlament assambleyasınıñ qış sessiyası yanvarniñ 27-nde Strasburgda başlandı.
Avropa Şurasınıñ Parlament assambleyası 2019 senesi iyünniñ 26-nda Rusiye eyyetini sanktsiyasız qaytarmağa razı oldı. Estoniya, Gürcistan, Latviya, Litvaniya, Poloniya, Slovakiya ve Ukrainanıñ PACE eyyetleri buña cevap olaraq toplaşuv salonını terk etti.
PACE, Rusiye eyyetiniñ rey aqqını ğayrıdan tiklemege qarar alğan soñ, Kreml «Qırım meselesini» Ğarpqa «ardı-sıra ve sabırnen añlatmağa» niyetlene, dep bildirdi.
Rusiye eyyeti, vekâletleri sıñırlanğan soñ 2015 senesi yanvar ayından berli assambleya sessiyalarında iştirak etmegen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
