2014 senesi Qıtayda separatizmde qabaatlanıp ömür boyu apis cezasına üküm etilgen uyğur alimi ve aq qorçalayıcısı İlham Tohti 2019 senesi Avropa Şurası Parlament assambleyasınıñ Vatslav Gavel mukâfatına lâyıq tanıldı, dep bildire Azatlıq Radiosı.
Qıtayda musulman uyğur azlığınıñ qorçalayıcısı olğan Tohtiden ğayrı, Balkan insan aqları gençler teşebbüsi de qayd etildi. Bu gruppa çeşit etnik gruppaları, region ve memleketlerinden yaşlar arasında bağ qurıp, barışıq olmasına yardım ete. Namzetler cedveline apiske alınğan tacik uquqçısı Buzurgmer Yorov de kirgen edi.
Vatslav Gavel mukâfatı 2011 senesi vefat etken devlet erbabı, 1989 senesi Qadife inqilâbınıñ liderlerinden biriniñ adını aldı.
Mukâfat 2013 senesi tesis etildi ve insan aqları qorçalavında yeñişlerni qayd ete. Mukâfat 60 biñ euro ola.
Keçken sene mukâfatnı «Memorial» aq qorçalayıcı merkeziniñ çeçen bölügi reberi, çeçen faali Oyub Titiyev aldı. O, narkotiklerni saqlağanında qabaatlanıp apiste yatqan edi. 2019 senesi iyünniñ 21-nde Titiyev azatlıqqa çıqtı.
