Sentâbrniñ 27-nden 30-na qadar Strasbourgda olacaq Avropa Şurası Parlament assambleyasınıñ küz sessiyasına «Qırımda Rusiye tarafından tamır halqlarnıñ siyasiy taqip etilüvi» meselesiniñ muzakere etilmesinen muracaat keldi. Bu aqta PACE matbuat hızmeti bildirdi.
«Afğanistandaki vaziyetniñ acele muzakere etilmesi istenildi; Letoniya, Litvaniya ve Poloniyanıñ Beyazrusiye sıñırında migratsion basqınıñ quvetleştirilüvi; Avropa Şurasınıñ kiber cinayetçilik şartnamesine işbirligini kenişletüv ve elektron delillerniñ açıluvına dair yañı protokol leyhası. «Ğarbiy Balkanlar demokratik talaplar v Avropa ıntıluvları arasında: Avropa Şurasınıñ rolü ne?» ve «Qırımda Rusiye tarafından tamır halqlarnıñ siyasiy taqip etilüvi» mevzusında adise-vaqialarnıñ muzakere etilmesi», – dep aytıla haberde.
PACE sessiyasında Avropa Şurasınıñ «sağlam tabiat aqqınıñ» pekitilmesi ve iklim deñişmelerinen küreş areketlerinen bağlı maruzalarnıñ muzakere etilmesi planlaştırıla.
Keçken afta Ukraina PACE eyyetiniñ azası, Yuqarı Rada deputatı Rustem Umerov Ukraina mezkür munaqaşalar keçirilmesi içün muracaat etti, dep bildirdi. Mektüp Avropa Şurası Parlament Assambleyasınıñ prezidenti Rik Daems adına berildi. İşbu muracaat yarımadada keçirilgen yañı tintüvler, qırımtatarlarnıñ tutulması ve apiske alınmasından soñ yollanıldı. Apiske alınğanlar arasında qırımtatar faali ve siyasetçi Nariman Celâl bar.
Hatırlatamız, Avropa Şurası Parlament assambleyası iyünniñ 23-nde Rusiye işğal etken Qırımda qırımtatarlarnıñ aqlarına dair qararnı qabul etti.
Qırımtatar Milliy Meclisiniñ reisi Refat Çubarov PACE eyyetiniñ Rusiye işğal etken Qırımda qırımtatarlarnıñ aqlarına dair qararınıñ qabul etilüvi «esaslı» ola, dep ayttı.
Rusiye Devlet Dumasınıñ halqara işler komitetiniñ reisi Leonid Slutskiy Rusiye PACEniñ işğal altındaki Qırımda qırımtatarlarnıñ aqları bozuluvına dair qararnı yerine ketirmeycek, dep bildirdi.
Rusiye Devlet Dumasınıñ spikeri Vâçeslav Volodin PACEde qırımtatarlarnıñ aqları bozulğanına dair taqdim etilgen maruzanıñ müellifi, İslandiya vekili Sunna Evarsdottirniñ memleketke kirişini yasaqlamaq içün teşebbüsçi ola bile, dep bildirdi.
Ukraina eyyeti Qırımda insan aqlarınıñ vaziyeti, insanlarnıñ ğayıp oluvı ve yarımadada qanunsız apiske aluvlar, qırımtatarlarnıñ aqlarını qoruv, Rusiyeniñ Qırımtatar Milliy Meclisini «terror teşkilâtı» olaraq tanıma qararınıñ lâğu etilüvinen bağlı meselelerni Avropa Şurası insan aqları komissarı Dunja Mijatović ile muzakere etken edi.m
