İyünniñ 10-nda saba Aqmescitteki ekinci «Hizb ut-Tahrir davasınıñ» mabüsi Ruslan Suleymanovnıñ ağası Eskender Suleymanovnıñ evinde keçirilgen tintüv vaqtında ağa-qardaşlarnıñ anası ve Rusiye quvetçileri arasında qavğa oldı. Zera Suleymanovanıñ aytqanına köre, quvetçilerden biri onı silânen qorquzmağa başladı. Bu aqta Qırım.Aqiqat mühbiri haber ete.
«Olarnı qarğamağa başladım. Biri çıqıp pıştavnı çıqardı ve menim tarafıma yöneltti. Ateş aç dedim, bir oğlumnı alğanlar, ekincisini de alalar», – dep ayttı qadın.
Ana-babanıñ aytqanına köre, Eskenderni «qayırıp», yerge yatqızğanlar, soñra turmağa izin bergenler.
Cep telefonları alındı, advokatqa telefon etmege ruhset berilmedi. Anası tintüv vaqtında yaramadı, acele yardım çağırıldı.
Rusiye quvet müessiseleri bu malümatnı şimdilik izaatlamay.
İyünniñ 10-nda saba Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ 8 er adam tutuldı.
Rusiye FSBsi tahqiqat tedbirleri 205.5 maddesi (terror teşkilâtınıñ faaliyetini teşkil etüv ya da iştirak etüv) boyunca cinaiy dava çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Ukraina uquq qoruyıcı organları Qırımda Rusiye quvetçileri keçirgen tintüvlerden sebep cinaiy tahqiqat başlattı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
