Aqyar yanında Saharnaya Golovka qasabasında yerli milliy dernekler baar kelüvini qayd etti. Qırım.Aqiqat mühburi bildirgeni kibi, martnıñ 10-unda bayramda leh, ukrain, belorus, mordva, maruy, çuvaş milliy-medeniy derneklerniñ vekilleri ve balalarınen beraber yerli sakinler iştirak etti.
Faalciler öz milliy bayramları aqqında ikâye etti, halq yırlarını yırladı, oynadı. “Poloniya” leh derneginiñ vekili Tatyana Gornostayeva, erte baarde lehler “Çırlama aftası”nı (Maslenitsa) degil de, “Yağlı cumaaqşamı”nı qutlay ve sofrağa çırlama degil, ponçik qoyula.
Belarus milliy-medeniy derneginiñ azaları, “Menim köyüm” belli belarus halq yırını icra etti.
Bundan ğayrı, bayramda çırlama aşama, arqan çekme, girâ köterme kibi yarışmalar keçirildi.
Soñunda Saharnaya Golovka qasabasınıñ balaçıqları çastuşka yırlap, bahşış aldı. Bayram iştirakçilerini çay ve qalaçnen sıyladılar.
