Tutulğan kişi Rusiye işğal etken şeerde 2017 senesinden 2019 senesine qadar yolbaşçılıq etti. Bundan evel ve bundan soñ o, Rusiye sanayı ve ticaret naziriniñ muavini edi. 2020 senesi onı işten çıqarğanlar. Olğan malümatqa köre, bunıñ sebebi İjevsk ava limanında uyğun olmağan areketlerinen bağlı qavğa oldı.
The Times yazğanına köre, sabıq Rusiye valisi Londradaki evinde tutuldı. Ovsânnikov fevralniñ 20-nde mahkemege çıqarılacaq. O, sanktsiyalarğa riayet etmegeninden ve Londra bankında esap açqanında, dört esabında umumen 65 biñ pound ödeme yapqanında ve 77,5 biñ pound saqlağanında qabaatlana, dep haber ete The Insider saytı.
Büyük Britaniya 2020 senesiniñ soñunda Ovsânnikovğa qarşı sanktsiyalar kirsetti. Onıñ aktivleri buzlatıldı. Sabıq Rusiye valisi Londra apishanelerinden birinde buluna. BBC Rusiye hızmeti qayd etkenine köre, bu vaziyet adiy degil: zorbalıq olmağan cinayetler içün apiske alınğanlar çoqusı allarda pey berip azat etile.
2023 senesi Ovsânnikov Avropa Birligi mahkemesiniñ qararınen Avropa Birligi sanktsiyaları cedvelinden çıqarılğan edi. Mahkeme memur sanktsiyalarnıñ sebebi olğan işini yapqan vazifede degil dep qarar çıqarğan edi. Britaniya cedvelinden onı çıqarmağanlar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
