Bu aqta Celâl ömür arqadaşına yazğan mektübinde bildirdi,dep haber ete «Qırım birdemligi».
«Tünevin Qırımdan Osman kelgenini ögrendik. Arifmemetovdır, amma soñra tam bilecem. Bir-eki afta karandinde olıp, tek mayısnıñ 7-nde umumiy kamerağa keçkendir», – dep yazdı Celâl.
Osmannıñ anası Emdiye Arifmemetovanıñ «Qırım birdemligine» tarif etkenine köre, şimdilik oğlundan bir haber kelmedi. Siyasiy mabüsni Rusiyeniñ Novoçerkassk №3 SİZOsına etap etkenleri aprelniñ başında belli oldı. Martnıñ 18-nde o ve Aqmescitteki «ekinci gruppanıñ» diger mabüsleri Rusiyeniñ farqlı müessiselerine çıqarıldı.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
2022 senesi noyabrniñ 24-nde Rostov-na-Donudaki Cenübiy arbiy okrugınıñ mahkemesi mabüslerni terror faaliyetinde ve akimiyet zapt etmege tırışqanlarında qabaatladı. Faaller Enver Ametov ve Yaşar Muyedinov 13 yıl sert rejimli koloniyada, vatandaş jurnalistleri Ruslan Suleymanov, Rustem Şeyhaliyev ve Osman Arifmemetov 14 yıl koloniyada qalmasına üküm etildi. Mabüsler 4 yılnı apishanede keçirecek, soñra daa 1 yılğa areket serbestligi sıñırlanacaq. Mabüsler özüni qabaatlı olaraq tanımayıp, siyasiy taqip olğanını tüşüneler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
