Cuma künü, oktâbrniñ 5-nde, Norvegiyanıñ Nobel komiteti Nobel dünya mukâfatınıñ laureat adını ilân etecek. Ukraina rejissöri Oleg Sentsov namzetlerden biri ola.
Keçken sene bu mukâfat «Nükleer silânı yoq etüv halqara şirketine» berilgen edi. Bu teşkilât «nükleer silânıñ qullanuvından olğan felâket aqibetlerine diqqat ayırğanı içün» taqdirlendi. Mukâfatlar dekabr ayında Stokgolm ve Osloda berilecek. Nobel mukâfatınıñ miqdarı 9 mln isveç kron ola, bu tahminen 1,1 million dollarnı teşkil ete.
Avgustnıñ 28-nde belli oldı ki, Poloniyanıñ sabıq prezidenti Leh Valensa Nobel mukâfatınıñ laureatı olaraq Oleg Sentsovnı aynı mukâfatqa namzet olaraq köstere. Valensanıñ qayd etkenine köre, Sentsov «al-azırda yetmegen küreşçi insan örnegini köstere».
Yuqarı Rada Rusiyede tutulğan ukrain rejissöri Oleg Sentsovnı Nobel dünya mukâfatına namzet olaraq köstermege qarar berdi.
Mayısnıñ 14-nde Oleg Sentsov Rusiye apishanelerinde yatqan bütün ukrainalı siyasiy mabüslerniñ azat etilmesi talabınen müddetsiz açlıq ilan etken edi.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
