Sentâbr 17-sinde OSCE toplaşuvında, rusiye vekilleriniñ "rusiyeli" Qırım aqqında laflarından soñ demarş yapqan Ukraina delegatsiyası, tedbirde işini devam etmege qarar aldı.
Bunı Ukraina Tış İşler Nazirligi, öz telegram kanalında bildire.
"Ortaqlarımıznen muzakerelerden soñ, delegatsiya eki aftalıq muşaverede işini toqtatmamağa qarar aldı. Demarş ortaqlarımıznı seferber etmege imkân berdi - Ukraina bütünligine qol tutıp AQŞ, Kanada, AB-niñ bir sıra memleketleri, şu cümleden reislik yapqan Slovakiya, İsveçre ve Gürcistan, vekilleri çıqışta bulundı", - denile beyanatta.
Ukraina eyyeti sentâbrniñ 17-nde OSCE toplaşuvı çerçivesinde söz serbestligi muzakere etilgen toplaşuv salonını «Rusiyege ait Qırım» laflarına narazılıq bildirmek içün terk etti.
Olarnıñ arasında sentâbrniñ 16-nda toplaşuvda iştirak etken «P. Hilendarskoy regional bulğar milliy-medeniy muhtariyetinden» Lüdmila Radeva, «Krımskaya gazeta» ve «Krımskiy jurnal» baş muarriri Mariya Volkonskaya, «Krımskoye informatsionno agentstvo» neşirinden Olga Leonova.
Rusiyege qoltutqan «Millet» qırımtatar telekanalınıñ baş müdiri Ervin Musayevniñ lafı da bölündi.
Sentâbrniñ 16-nda Varşavada sentâbrniñ 27-ne qadar devam etecek OSCE insan ölçevini esaplav toplaşuvı başlandı.
OSCE toplaşuvında iştirak etmek içün Rusiye akimiyeti ve yarımada teşkilâtlarını temsil etken qırımlı iştirakçiler qayd etildi.
Ukrainanıñ Viyanadaki halqara teşkilâtlar vekili Yevğen Tsımbalük OSCE insan ölçevini esaplav toplaşuvında Rusiye akimiyeti ve yarımada teşkilâtlarını temsil etken işğal etilgen Qırım iştirakçileriniñ «sözü birden bölünmeli», dep bildirdi.
