Varşavadaki (Warsaw Human Dimension Conference) OSCE konferentsiyası çerçivesinde aq qorçalayıcılar Qırım sakinleriniñ Rusiye uquq qoruyıcıları tarafından taqip etilüvi aqqında tarif etti, dep haber ete «KrımSOS» aq qorçalayıcı teşkilâtı.
«Kelecek sene fevral ayında Qırım işğaliniñ 10 yılı olacaq. 2014 senesinden başlap qırımtatarlar işğalcilerniñ repressiv siyasetinden zarar köre. Çeşit malümatqa köre, qırımtatarlar Qırım ealisiniñ 13%-ı ola. Qırımnıñ tamır halqı qırımtatarlarnıñ taqip etilüvi – Sovetler Birligi vaqtından genotsid siyasetiniñ devamıdır, Rusiye onı alâ daa qullana. Rusiye cinayetlerini aqlamaq içün qırımtatarlardan «terrorist», «ekstremist» ve «diversant» yapa», – dep tarif etti «KrımSOS» koordinatorlarından biri Sabina İlyasova.
Aq qorçalayıcılarda olğan malümatqa köre, Qırımda siyasiy sebepli taqipniñ 186 qurbanından 110-u qırımtatarı ola, tintüvlerniñ 75%-ı qırımtatarlarnıñ evlerinde keçirile. Aq qorçalayıcılar qayd etkenine köre, «bu, Qırımda işğalci akimiyet bozğan halqara normalarnıñ tek bir qısmı ola».
«Bu quru statistikada bozulğan insan ayatları saqlana. Rusiye insan aqları ve halqara gumanitar uquqnı yıllar devamında körmemezlikke ura, Qırımda yañı deşetlerni toqtatacaq yekâne vasta yarımadanıñ işğalden azat etilüvi ola», – dep tüşüne aq qorçalayıcı.
ZMINA insan aqları merkeziniñ leyha reberi Viktoriya Nesterenko Qırım mabüslerine tibbiy yardım kösterilmegenini qayd etti. Mında em Aqmescit SİZOsında tutulğanlar, em Rusiyege etap etilgenler aqqında aytıla.
Front Line Defenders halqara fondunıñ vekili Anastasiya Moskviçeva halqara toplulıqnı Rusiyeden işğal etilgen Ukrayına topraqlarında taqip ve insan aqlarınıñ bozuluvını toqtatmasına çağırmasını devam ettirmege çağırdı.
«İmkânıñız olsa, mahkeme esnaslarına barıñız (eñ azından memleketiñizniñ elçihanesi olğan Rusiye topraqlarında) ve aq qorçalayıcılar tutulğn apishane ziyaretlerini talap etiñiz ya da mustaqil monitoring missiyalarınıñ böyle ziyaretlerine qoltutıñız... bu vaziyetni tahqiq etmek içün «Moskva mehanizmini» başlatuv imkânını baqmağa çağıramız», – dep çağırdı Moskviçeva.
Qırım.Aqiqat mühbiri bildirgenine köre, OSCE konferentsiyasında «Cemaat qararı» fondunıñ müdiresi Natalya Naubina Rusiyege avuştırılğan vatandaş reineleri aqqında ayttı, olar Rusiye apishanelerinde dünyanen bağsız tutula.
Hatırlatamız, «Qırım ğayesi» aq qorçalayıcı teşebbüsiniñ malümatına köre, Aqmescitteki SİZO-2-de yañı işğal etilgen Ukrayına topraqlarından eñ az 110 insan bağsız, iç bir qabaatı aydınlatılmadan tutula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
