Avropa Birligi, işğal etilgen Qırımnıñ Rusiye tarafından keniş ve büyük askeriyleştirilüvi sebebinden qasevetlengenini bildirdi.
Bu aqta yanvarniñ 15-nde Viyanada keçirilgen OSCE telükesizlik saasındaki işbirligi forumınıñ toplaşuvı vaqtında seslendirilgen Avropa Birligi eyyetiniñ beyanatında aytıla, dep bildire «Ukrinform» agentligi.
«Qırım yarımadasınıñ Rusiye tarafından keniş ve büyük askeriyleştirilüvi sebebinden pek qasevetlenemiz, o, Qara deñiz regionında ve onıñ tışında telükesizlikke tesir etmege devam ete», – dep aytıla beyanatta.
Forum toplaşuvında AB Rusiyeniñ Ukrainağa qarşı tecavuz areketlerini qararlı bir şekilde takbih etip, Qırım Muhtar Cumhuriyeti ve Aqyarnıñ qanunsız ilhaqını tanımay, dep hatırlattılar.
2019 senesi dekabr ayında BM Baş Assambleyası Rusiyeni işğal etilgen Qırımdan ordusını çıqarmasına ve Ukraina topraqlarınıñ vaqtınca işğalini toqtatmasına çağırğan qararnı qabul etti.
2018 senesi dekabrniñ 17-nde Qırım, Qara ve Azaq deñizleriniñ askeriyleştirilüvinen bağlı qabul etilgen BM Baş Assambleyasınıñ qararı Rusiyeni Qırımdan ordusını çıqarmasına çağıra ve Qara ve Azaq deñizlerinde artqan Rusiye arbiyleriniñ bulunmasını takbih ete.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
