«Omikron» koronavirus ştammınıñ tez cayravı mekteplerniñ qapatıluvı, kruiz gemi seyaatlarınıñ toqtatıluvı ve dünyada biñlernen uçaq seferiniñ lâğu etilüvi içün sebep oldı, dep haber ete Azatlıq Radiosı.
Kanadada ealisi eñ sıq olğan Ontario vilâyeti ükümet yolbaşçısınıñ yanvarniñ 3-nde bildirgenine köre, mektepler qapatılacaq ve hasta sayısı rekord olğanı içün online ögretüvge keçilecek. Bu vilâyette restoran, sport salonları ve kinoteatrler de qapatıla, Ontario hastalarnıñ «tsunamisine» azırlana.
Dünyada aman-aman 5 biñ uçaq seferi sekiz künden berli lâğu etile, biñden ziyade uçaq seferi COVID-19-ğa oğrağan hadimleri sebebinden lâğu etildi.
Braziliya yalıları boyunca kruiz gemileriniñ seyaatlarını lâğu etmek qararı «soñki künleri gemilerde COVID-19 hasta sayısı tez artqanına» esaslanğan milliy sağlıq müessisesiniñ tevsiyelerinden soñ qabul etildi.
Amsterdamda sıñırlavlarğa açuvlanıp narazılıq bildirgenler yasaqlanğan numayıştan soñ polisnen zıddiyet çıqarğan 30 kişi apiske alındı. Botsvana Afrika memleketi prezidenti COVID-19 testi müsbet çıqqan soñ, izolâtsiyağa kete, dep bildirdi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.