«Omikrondan» soñ COVID-19 pandemiyası Avropada yekünlene bile – Dünya sağlıq teşkilâtı

Avropada COVID-19 pandemiyası koronavirusnıñ «omikron» yañı ştammınıñ dalğası yekünlengen soñ bite bile, dep bildire Dünya sağlıq teşkilâtı.

Dünya sağlıq teşkilâtınıñ Avropa regionı müdiri Hans Klugeniñ aytqanına köre, «regionnıñ pandemiyanıñ soñki fazasına doğru ketkeniniñ bir ihtimalı ola bile». Faqat yañı koronavirus variantları ola bilecegini diqqatnen közetmeli, dep tenbiley o.

Klugeniñ fikirince, Avropada «omikron» dalğası yavaşlaşqan soñ bir qaç afta ya da ay içinde global immunitet olacaq». Yaz yaqınlaşqanınen sukünet olacaq, yılnıñ soñunda COVID-19 kene qayta bile, amma «pandemiya ille qaytacaq kibi bir şey yoq», dep tüşüne Dünya sağlıq teşkilâtınıñ vekili. Aynı vaqıtta pek muqat olmaq kerek, çünki koronavirus bizni çoq şaşırtqan edi, dep qoştı Hans Kluge.

Dünya sağlıq teşkilâtınıñ eksperti Mariya van Kerkhove Klugenen razı degil. O, «omikron» hastaları eksilse de, pandemiya bitmeycek, çünki virus mutatsiyağa oğray ve yañı variantları daa telükeli ola bile.

İlk sefer «omikron» ştammı Cenübiy Afrika Cumhuriyetinde 2021 senesi noyabr ayında qayd etildi. Dünya sağlıq teşkilâtı oña «qasevet doğurğan statusını» bergen edi.

Dünya sağlıq teşkilâtınıñ malüma tına köre, mart ayına qadar Avropa regionı sakinleriniñ 60-tan çoq fayızı «omikron» variantına oğray bile, o, diger koronavirus ştammlarına köre daa tez yuqula. Daa evel koronavirus yuqunçına oğrağanlar ve aşı olğanlar tekrar hastalana bile. Alimler bu variant ondan evelkilerge köre daa qolay keçe, dep tüşüne. Faqat hasta sayısınıñ tez artması vefat sayısına ve ağır hasta sayısına tesir ete bile. Bir çoq memlekette, hususan Rusiyede hasta sayısı pek tez arta.