Ukrayina, Halqara Qızıl Haç Komitetiniñ ukrayin cenk esirlerine yiberilmesini talap ete. Bu aqta Ukrayina Yuqarı Radasınıñ insan aqları vekâletlisi Dmıtro Lubinets Rusiye vekâletlisi Tatyana Moskalkova, Ukrayinada Qızıl Haç eyyetiniñ yolbaşçısı Yurg Eglin ve RF ve Belarustaki Halqara Qızıl Haç Teşkilâtınıñ eyyetiniñ yolbaşçısı Boris Mişel ile körüşüvden soñ yazdı.
Onıñ aytqanına köre, böyle körüşüv ukrayin tarafınıñ teşebbüsi ile ilk sefer ötkerildi.
"Ukrayin tarafı, öz vekâletiniñ ve Jeneva konventsiyalarınıñ tolusınen yerine ketirilmesini temin etmek maqsadınen, Halqara Qızıl Haç komitetine ukrayin esirleriniñ tutuluv yerlerine barılmasına izin berilmesi kerekligini bir qaç kere qayd etken edi", — dep bildirid Lubinets.
Bundan da ğayrı, Ukrayina Rusiyeden, üçünci konventsiyağa köre, ağır yaralanğan ve ağır hastalarnıñ Ukrayinağa prioritetli repatriatsiyası içün qarışıq tibbiy komissiyalarnı meydanğa ketirmekni rica ete.
Dekabr ayında Qırım.Aqiqat içün cenk esirleri içün lagerde ekskursiya keçirgen cenk esirleri ile munasebet meseleleri Koordinatsion ştabınıñ vekili Petro Yatsenko, Rusiye cenk esirleri Jeneva şartnamesiniñ talaplarına köre tutula, dep tarif etti. Onıñ aytqanına köre, Rusiye esirleri içün lagerge Qızıl Haç temsilcileri muntazam sürette kele.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
