Ukraina Yuqarı Radasınıñ insan aqları vekâletlisi Lüdmila Denisova «Afğanistan ve terrorizm ile küreş tedbirleriniñ veteranları umumukrain birligi» cemaat teşkilâtınıñ reisi Sergey Kunitsınge «2019 senesi Ukrainada insan ve vatandaş aqları ve serbestliginiñ qorunmasına qoşqan issesi» içün fahriy yarlıq berdi.
Denisovanıñ matbuat hızmeti bildirgenine köre, o, cemaat teşkilâtınıñ reisinen Ukrainada insan aqları ve serbestliginiñ, hususan cenk veteranları, cenk neticesinde saqatlığı olğan insanlar ve cenkte elâk olğanlarnıñ qoranta aqları bozulmasın dep, küçlerniñ birleştirilmesinen bağlı işbirligi memorandumını imzaladı.
«Eminim, Afğanistan veteranları ve Ukraina şarqındaki Ukraina-Rusiye cenk iştirakçileriniñ uquqiy ve içtimaiy qoruvı saasında bizim işbirligimiz semereli olıp, Ukraina vatandaşlarına faydalı olacaq», – dep aytıla haberde.
Sergey Kunitsın – Aqyar şeer devlet memuriyetiniñ sabıq reisi, Qırım Muhtar Cumhuriyeti ükümetiniñ sabıq reisi, Ukraina prezidentiniñ Qırım Muhtar Cumhuriyetindeki sabıq daimiy vekili, I, VII, VIII çağırılış Ukraina halq deputatı, 1998-2012 seneleri Qırım Muhtar Cumhuriyeti Yuqarı Şurasınıñ deputatı.
