Ukraina Yuqarı Radasınıñ insan aqları vekâletlisi Lüdmila Denisovanıñ bildirgenine köre, Donbasnıñ işğal etilgen qısımlarında, işğal etilgen Qırımda ve Rusiyede tutulğan ukrainalı reine ve siyasiy mabüsler aqqında haberler derc etilgen soñ, ombudsmenniñ saytına haker ücümleri kerçekleştirildi.
Denisovanıñ qayd etkenine köre, böyle areketler neticesinde resurs işini vaqtınca toqtata, bazıda ise ücümlerden soñ derc etilgen malümat yoq ola.
«Misal olaraq, tünevin ukrainalı siyasiy mabüs Serğiy Buğayçuknıñ koronavirus yuqunçına oğrav şübhesi bar olğanına dair haberden soñ sayt böyle ücümlerge eki kere oğradı», – dep aytıla haberde.
Denisova, Ukraina telükesizlik hızmetiniñ yolbaşçısı İvan Bakanovğa muracaat etip, tahqiqat tedbirlerini başlatmasını ve qabaatlılarnı tapmasını rica etti.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
