Ukraina Yuqarı Radasınıñ insan aqları vekâletlisi Lüdmila Denisova advokat Nikolay Polozov ile qırımtatar faalleri Nariman Celâl, Asan ve Aziz Ahtemovlarnıñ davalarını muzakere etti ve apis etilgen Qırım sakini İvan Yatskinniñ sağlıq alı aqqında malümat aldı.
«Qanunsız olaraq siyasiy sebeplerden tevqif etilip Aqmescit SİZO-sında tutulğan Celâl, Asan ve Aziz Ahtemovlarnıñ aqlarına riayet etilmemesine diqqat ettik. Ukraian TİN tarafından uquqiy mudafaanıñ temin etilmesiniñ ve olarğa tibbiy yardım kösterilmesiniñ keyerkligini qayd ettik», – dep yazıla ombudsmannıñ matbuat hızmetiniñ bildirmesinde.
Haber etilgen kibi, Aqmescit SİZO-sında tutulğan ukrain İvan Yatskinniñ sağlıq alı zayıflaştı.
«Yazıq ki, trombofleit neticesinde eki ayağında da trofik ülseri keskinleşti. Aqmescit SİZO-sınıñ müdiriyeti acele tibbiy yardım kerek olğanı faktını körmemezlikke urmağa devam ete. Bu semetdeşimizniñ ayatını telüke altına qoya», – dep qayd etti Denisova.
Ukraina Yuqarı Radasınıñ insan aqları vekâletlisi, Qırımda tevqif etilgen ukrainlerge uquqiy destek kösterilmesini istep, Ukraina TİN başına muracaat etti. Bundan ğayrı Rusiye ombudsmanı Tatyana Moskalkovadan İvan Yatskinniñ ihtisaslı bir tibbiy müessisesinde baqınuvdan keçmesini temin etmege talap etti.
