Ukrayina prezidentiniñ Qırım Muhtar Cumhuriyeti ve Aqyarda daimiy temsilcisiniñ vazifelerini vaqtınca eda etken vazifege bundan evel prezidentniñ Qırım Muhtar Cumhuriyetindeki sabıq temsilcisi Tamıla Taşevanıñ muavini vazifesini eda etken Ölğa Kurışko tayin etildi. Bu aqta dekabrniñ 5-nde müessiseniñ matbuat hızmeti haber etti.
Kurışko Yaroslav Mudrıy adına Ukrayina Milliy adliye akademiyasında tasil aldı. Uquqçı olıp, hususan, "KrımSOS" uquq qoruyıcı teşkilâtında çalıştı.
Öz işini Ukrayina prezidentiniñ Temsilciliginde 2021 senesi dekabr ayında müessiseniñ uquqiy temin etüv bölüginiñ yolbaşçısı vazifesinden başladı. O, reintegratsiya meseleleri boyunca strategik ve programma vesiqaları üzerinde çalıştı, ilhaq etilgen Qırım ve Aqyar sakinleriniñ tasil almaq, pensiya teminlevi, pasport vesiqalarını almaq, siyasiy mabüsler ve olarnıñ aile azalarına qol tutuv saasında aqlarını qorçalav boyunca normativ-uquqiy aktlarnıñ işlep çıqarılmasında iştirak etti.
O, 2023 senesi iyün ayında Ukrayina prezidentiniñ QMC daimiy temsilcisiniñ muavini vazifesine tayinlengen edi.
Tünevin Ukrayina prezidenti Volodımır Zelenskıy Tamila Taşevanı Qırım Muhtar Cumhuriyetindeki daimiy temsilcisi vazifesinden boşattı. №800/2024 buyruğı devlet yolbaşçısınıñ saytında derc etildi. Derc etilgen vesiqağa köre, Taşeva özü ariza yazğan.
Ukrayina prezidentiniñ temsilciligi saytında Tamila Taşevağa "müessiseniñ idaresi terkibinde 5 yıl devamında toqtamayıp çalışqanına» minnetdarlıq bildirildi", o, 2020-2022 seneleri daimiy vekilniñ muavini vazifesinde edi ve 2022-2024 seneleri müessise müdiri vazifesinde oldı.
"Bu zor 2022-2024 seneleri temsilcilik daimiy vekil Tamila Taşevanıñ reberligi altında vaqtınca işğal etilgen yarımadanen bağlı devlet siyasetini belgilegen esas saalar üzerinde faal çalışmağa devam etti. Ğayretler Qırımdaki vaziyetniñ monitoringine, işğal etilgen topraqlar siyasetiniñ şekillenüvi ve amelge keçirilmesi boyunca tevsiyelerni işlep çıquvğa, em de Qırım platformasınıñ faaliyeti çerçivesinde halqara işbirlikni pekitüvge yöneltildi", – dep qayd etile haberde.
Taşeva bundan evel böyle bir niyeti olmağanını ve Ukrayina prezidentiniñ Qırım Muhtar Cumhuriyetindeki daimiy vekili olıp çalışmağa devam etecegini aytsa da, yaqın vaqıtta Ukrayina Yuqarı Radasında çalışıp başlaycaq, dep bildirdi.
"Demek, yaqın vaqıtta men Ukrayina Yuqarı Radasına işke keçecem. Bilem, bir çoquñız, işdeş ve dostlarım, parlamentke çalışmağa keçecemmi dep soray ediler. Yalan aytmam, qarar pek zor edi, amma soñunda qabul etildi", – dep yazdı Taşeva Facebook saifesinde.
Noyabrniñ 25-nde Ukrayina merkeziy saylav komissiyası prezidentniñ Qırım Muhtar Cumhuriyetindeki daimiy vekili Tamila Taşevanı saylanğan halq deputatı olaraq belgiledi. O, mandattan vazgeçüv arizasını bergen İvan Primaçenkodan soñ nevbetteki ola.
Aynı vaqıtta Taşeva "Ğolos" fırqasından Yuqarı Radağa deputat olmaycaq ve vazifesine devam etecek, dep bildirgen edi.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
