Orta küzniñ 27-ne keçer gecesi Ukrayina Yuqarı Radasınıñ insan aqları vekâletlisi Dmıtro Lubinets Herson vilâyetiniñ işğal etilgen Oleşkı şeerinden vatandaşlarnıñ tahliye etilmesi içün "tınçlıq rejimi" başlağanını ilân etti.
"Bugün Kıyiv vaqtınen saat 3:00-te ve Moskova vaqtınen saat 4:00-te Oleşkı şeerinde gumanitar missiyasınıñ keçirilmesi ile bağlı bazı territoriyalarda ateş toqtatıluvı ilân etildi. Bu, Rusiye Federatsiyası insan aqları vekâletlisi Yana Lantratova ile beraberlikte ABD birinci hanımı Melaniya Trampnıñ koordinatsiyası ile alıp barılğan gumanitar missiya çerçivesinde ola", — dep bildirdi Ukrayin ombudsmanı
Rusiye Mudafaa nazirligi de tınçlıq rejimi aqqında bildirdi: Herson vilâyetiniñ Oleskı meskün yeri civarında gumanitar operatsiyasınıñ keçirilmesine azırlanuv sebebinden Rusiye Federatsiyasınıñ silâlı quvetleri Herson yönelişinde ateşni toqtattı ve 2026 senesi Orta küzniñ 27-nde saat 4:00-ten başlap tınçlıq rejimi tayin etildi.
Orta küzniñ 23-nde Beyaz ev, Ukrayina ve Rusiye "gumanitar yardımnıñ kirmesini ve vatandaşlarnıñ telükesiz koridor vastasınen tahliye etilmesini azırlamaq içün "Oleşkıda ateş toqtatılmasına" razı oldılar, dep bildirdi.
Dmitro Lubinets, Orta küzniñ 29-nda, Oleşkığa gumanitar yardımnıñ ketirilmesi, Oleşkıdan çıqmaq istegen vatandaş ealisiniñ serbest areketiniñ bloksuzlanması ile bağlı gumanitar missiya başlanacaq, dep añlattı.
Oleşkı Rusiye tarafından 2022 senesi Kiçikte, keñ kölemli basuvnıñ ilk künlerinde işğal etildi.
Herson OVA-sınıñ malümatına köre, tahminen eki biñ insan, olarnıñ arasında aman-aman 50 bala, Oleşkıda qala. Memuriyetniñ aytqanına köre, Rusiye quvetçileri yardımnıñ ketirilmesine keder ete ve sakinlerni şeerden çıqmağa imkân bermey.