Eski siyasiy mabüs Oleg Sentsov dekabrniñ 22-nde azat etilgen diger siyasiy mabüsler ve qorantalarınen körüşti. Körüşüv neticesinde Rusiyedeki bütün siyasiy mabüslerni Kreml mabüsleri gruppasına birleştirip, olar aqqında aytmaq ve azat etilmeleri içün işni toqtatmamaq kerek, dep ayttı.
«Eski siyasiy mabüsler, daa apiste olğanlarnıñ qorantaları, faal ve devlet hızmetçilerinen faydalı bir körüşüv oldı. Bizni Veteran Habta toplağan İgor Kotelânets sağ olsun. Alâ daa duşman qolunda qalğan esirlerimizşe nisbeten «Soñuna qadar» cemaat strategiyasına qoltutam», – dep yazdı Sentsov Facebook saifesinde.
Sentsovnıñ qayd etkenine köre, körüşüv vaqtında bir çoq yañı insannen tanışıp, problemlerini eşitti.
«Kostenkoğa ğayıp olğan babasınıñ dairesini kimse qaytarmağa istemey, Vıgovskiyniñ oğlunı oña kerek olğan mektepke avuştırmaylar, birisine ise devletten para yardımını bermeyler. Problem çoq, amma eñ esası – balalarımız alâ daa anda», – dep yazdı Sentsov.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
