Moskvada mayısnıñ 5-nde faaller mahküm etilgen qırımlı ukrain rejissöri Oleg Sentsovğa qoltutmaq içün bir kişilik narazılıq aktsiyalarına çıqıp, Rusiye ve Ukraina arasında mabüslerni almaştırmağa talap ettiler. Bu aqta vatandaş faallerinden biri Konstantin Kotov Qırım.Aqiqatqa bildirdi.
Faaller «Arabatskaya» metrosına «Er kesni almaştırmaq! Olegge azatlıq!», «Ukrainanen cenk olmasın» yazuvlı şiarlarınen çıqtı.
Aktsiya başlağan soñ Rusiye politsiyasınıñ hadimleri Konstantin Kotovnıñ vesiqalarını teşkermege keldi.
«Pasportımnı baqtılar, Rusiye vatandaşı olğanımnı kördiler. Qayd olğan yerimni baqacaq ediler, amma men köstermedim. Çoq davalaştıq, qayd olğan yerimni baqmağa aqları yoq, dep israr ettim. Neticede ketkenler», – dep tarif etti faal Qırım.Aqiqatqa.
Mayısnıñ 1-nde Rusiyeniñ paytahtı Moskvada «Strategiya-18» Rusiye teşebbüsiniñ faalleri Rusiye ve işğal etken Qırımda siyasiy sebeplerden tutulğan Ukraina vatandaşlarını azat etmek talabı ile bir kişilik narazılıq aktsiyalarını keçirdi. Anda 2018 senesi noyabr ayınıñ soñunda Qırım yalısında FSB tarafından zapt etilgen ukrainalı arbiyler, ukrainalı rejissör, siyasiy mabüs Oleg Sentsov, qırımlı Volodımır Baluh, qırımtatar faalleri aqqında aytıldı.
Aq qorçalayıcılarnıñ malümatına köre, 80 Ukraina vatandaşı Rusiyede ve işğali altındaki Qırımda siyasiy ve diniy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
