Rusiye akimiyeti terakt azırlağanı qabaatınen 5 yılğa üküm etken Ukrayına tarafdarı faal, qırımlı Oleg Prıhodko eki yañı qabaat sebebinden daa dört buçuq yıl qoştı. Bu aqta «Suspilne» qırımlı Natalâ Şvetsovanıñ qızı bergen malümatqa esaslanıp bildire.
Berilgen malümatqa köre, Rusiye mahkemesi Prıhodkoğa «terrorizmni aqlav» (Rusiye Federatsiyası Ceza kodeksiniñ 205-inci maddesiniñ 2-nci qısmı) ve «agressiv cenkni başlatmağa açıq çağıruv» (Rusiye Federatsiyası Ceza kodeksiniñ 354-ünci maddesiniñ 1-inci qısmı) apis cezası qoştı. Prıhodko «Vladimirskiy tsentral» olaraq belli apishaneden videobağı vastasınen mahkeme oturışuvında iştirak etti.
«Dört saat tutqanlar, saat 6:00-dan berli anda edi. Subetleşüv problemlerini çıqrğanlar. Yani keder etip kirgenler, advokatnen laf etmege bermegenler. Bir şey eşitmey de, añlaysıñız. Yani mahkeme oldı ve oña üküm çıqarıldı: madde qoşuldı... Şimdi 4,5 yıl sert ceza berildi», – dep bildire Prıhodko qızınıñ aytqanlarını «Suspilne».
Daa evel bildirgenine köre, Rusiye akimiyeti terakt azırlağanı qabaatınen 5 yılğa üküm etken 64 yaşında Oleg Prıhodko, Ukrayına tarafdarı faalge qarşı daa eki cinaiy dava açıldı. «Mediazona» bildirgenine köre, onı terrorizm propagandası ve natsizm reabilitatsiyasında qabaatladılar. Yañı davalarnıñ sebebi qırımlınen aynı kamerada olğanlarnıñ çaquvları oldı.
Oleg Prıhodko 2019 senesi oktâbrniñ 10-nda tutuldı. Rusiye FSBsi onı terror ücümini azırlağanında ve patlayıcı maddelerni qanunsız azırlağanında qabaatladı.
2021 senesi martnıñ 3-nde Rusiyeniñ Rostov-na-Donu şeerindeki Cenübiy okrugınıñ arbiy mahkemesi Prıhodkoğa üküm çıqardı. Onı 5 yılğa üküm etkenler.
«Memorial» aq qorçalayıcı merkezi Oleg Prıhodkonı siyasiy mabüs dep tanıdı.
2022 senesi yanvarniñ 19-nda Oleg Prıhodkonıñ qızı Qırım.Aqiqatqa tarif etkenine köre, Rusiye apsinde babasına qarşı işkence yapıla». Qırım.Aqiqat Rusiyeniñ Cezalarnı yerine ketirüv federal hızmetine muracaat etip, Oleg Prıhodkonıñ sağlıq vaziyeti aqqında soradı, amma cevap alamadı.
2021 senesi oktâbr ayında advokat Sergey Legostov Prıhodkonen körüşken soñ Rusiye koloniyasında qırımlığa «pek sert yanaşalar», dep bildirdi. Prıhodkonıñ tuvğanları Qırım.Aqiqtqa Rusiye koloniyasında Olegniñ ayaq problemleri başladı, dep bildirdi.
Prıhodkonıñ tuvğanları Qırım.Aqiqatqa bildirgenine köre, aman-aman yarım yıl bağlanıp olamaylar. Prıhodkonıñ qorantası çıqarılğan üküm çerçivesinde 200 biñ ruble para cezasını ödedi, dep haber etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
