Qarasuvbazardaki "Taygan" safari parkında eki tilki sığındı, olarnıñ anasını maşna urdı, bunı parknıñ müdiri Oleg Zubkov aytıp berdi.
Oña köre, tilkini urğan aqay yol çetinde eki tilkiçikni körip, olarnı "Taygan"ğa ketirmege istedi.
"Veterinarlar olarnıñ nezaret altına karantinge alır. Tilkiçikler sağlam, tendirist, bir aylıqlardır. Olar semiz, baqımlı ve şevqatlılar. Kimse qarşı olmasa, belki de adlarını Korona ve Virus qoyarmız", - dedi Zubkov.
Aprelniñ 22-sinde "Taygan" parkına beş qaşqır balasını ketirdiler. Olarnıñ anasını avcılar öldürdi.
"Taygan" arslanlar parkı Qarasuvbazarda 32 gektarlıq topraqta yerleşken. Mında arslanlar ve qaplanlar toplamı tutula, olarda ğayrı parkta 2 binden ziyade başqa ayvan yaşay.
