2023 senesi oktâbr ayında Rusiye 115 tam raketa işlep çıqardı, 870 raketa yedeklerinde bar, dep bildirdi Ukrayına Mudafaa nazirliginiñ Baş istihbarat idaresiniñ vekili Vadım Skıbıtskıy RBK-Ukrayına intervyüsında.
Ukrayına istihbaratınıñ malümatına köre, Moskva keçken ay 40 dane X-101 qanatlı raketası, 30 «İskander-M» ballistik raketası, 20 kalibr, 12 «İskander-K» raketası, 9 X-32 raketasі ve 4 «Kinjal» aeroballistik raketasını yaptı.
Skıbıtskıy, Rusiye küz-qış mevsiminde Ukrayına infrastrukturasına ücümlerni başlatmaq içün energetik sistemağa yüklerniñ artmasını bekley.
«Suvuqlar kelgende ola bile, elektrik energiyası küz-qış mevsiminde daa çoq sarf etilecek – rusiyeliler avalar sıfırdan aşağı olmasını bekley», – dedi o.
Ukrayına Mudafaa nazirligi Baş istihbarat idaresiniñ vekili Rusiyeniñ ücümleri qarışıq ola bile, dep qoştı – rusiyeliler em çeşit raketalarnı, em raketa silâsı ve darbe uçucısızlarını qullana bile.
«Ukrayına arbiy istihbaratınıñ tahminlerine köre, bu ücümler keçken senege oşamaycaq. Rusiyeliler maqsadına qolay-qolay irişemez – biz de azırlanamız ve nasıl areket etkenlerini añlaymız, energetik sistemamıznı qorumaq içün tedbir alamız», – dedi Vadım Skıbıtskıy.
Britaniya istihbaratı bildirgenine köre, Rusiye arbiyleri qışta Ukrayına energetikasına ücüm yapmaq içün azırlana bile.
2022 senesi oktâbrniñ 10-ndan başlap Rusiye arbiyleri Ukrayınanıñ kritik energetika infrastrukturasına ateş etip başladı, elektrik energiyası problemleri peyda olğan edi. 2023 senesi Rusiye ücümlerni eksiltti, Ukrayına ise küçni ğayrıdan tiklep oldı, elektrik energiyasınıñ itali de yardım etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
