Link açıqlığı

Saatnıñ esas haberi

«Bir kamerada 6 qadın bar ve olar ep deñişe»: Qırımda mahküm etilgen ukrayin Senecuknıñ qızı yarımadada qadınlarnıñ taqip etilüvi aqqında


Qırımlı Oksana Senecuk Rusiye kontrolindeki Aqyar şeer mahkemesinde devlet hainligi maddesine istinaden üküm çıqarılğanda, 2024 senesi dekabrniñ 26-sı
Qırımlı Oksana Senecuk Rusiye kontrolindeki Aqyar şeer mahkemesinde devlet hainligi maddesine istinaden üküm çıqarılğanda, 2024 senesi dekabrniñ 26-sı

İşğal etilgen Qırımda «devlet hainligi» sebebinden mahküm etilgen ukrayin Oksana Senecuknıñ qızı Mariya Köstük yarımadada qadınlarnıñ tutuluvları artqanını bildirdi. Bu aqta o, Qırım.Aqiqat Radiosınıñ yayınında ayttı.

«O, [Qırımnıñ Rusiye akimiyeti – QA] iqtidarını köstermege istegenine oşay ve pek çoq qız, qadınnı tuta», – dep tarif etti Köstük.

Onıñ aytqanına köre, bu qadınlar Aqmescitniñ tahqiqat izolâtorında oşağan qabaatlarnen buluna ve daima «deñişe», çünki ükümden soñ Rusiyege alıp ketirilgenler yerine başqalarını ketireler. «Aralarında pek genç olğanlar bar – 18 yaşındalar. Daa balalar», – dep tarif etti Kostük.

Oksana Senecuknıñ da fizikiy ve psihologik vaziyeti yahşı degil, dey qızı. O, anasınen tek mektüpler yardımınen bağlana bile, olar, soñki vaqıtlarda, «Zonatelekom» [Rusiyeniñ Federal ceza hızmetiniñ resmiy operatorı – QA] sistemasındaki bozuvlar sebebinden keç kele ediler.

Hatırlatamız, 2024 senesi dekabrniñ 26-nda işğal etilgen Aqyardaki Rusiye mahkemesi Senecuknı «devlet hainligi» davası boyunca 15 yıl umumiy rejim koloniyasında qalması üküm etti.

Rusiye tahqiqatınıñ malümatına köre, Senecuknı Ukrayina mahsus hızmetleriniñ casusı celp etken eken. Onıñ emrinen 2023 senesi mart ayında Senecuk közetken, foto yapqan ve Ukrayina istihbaratına Rusiye Qara deñiz flotunıñ gemileri aqqında malümat yollağan eken.

58 yaşında Oksana Senecuk – tasili filolog, yarımada işğalinden evel Aqyar şeer devlet memuriyetinde çalıştı. 2014 senesine qadar yapqan işi ve faal vatandaşlıq vazifesi içün mukâfatları bar. O, Yeuromaydanğa faal sürette qoltutqan ve anda iştirak etken edi.

Fevralniñ 3-nde belli olğanına köre, Senecuk ve advokatı ükümge qarşı şikâyetler berdi.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG