Cemaat erbabı, “Okean Elzı” ukrain rok-taqımınıñ lideri Svyatoslav Vakarçuk, Qırım ilhaqı arfesinde anda barğanı aqqında ilk sefer ikaye etti. Bu aqta o dekabr 1-inde Kyivde “Qırım inciri” edebiy yarışınıñ mukâfatlandıruv tedbirinde aytıp berdi dep haber ete Qırım.Aqiqat muhbiri.
“Men bu ikâyeni ilk sefer mında aytıp bermege istedim. Bu 2014 senesi mart 8-inde edi. Men, Qırımda ciddiy şeyler olıp keçkenini añlay edim. Öz istegimnen Aqmescit ava limanına uçıp bardım. Çıqışta meni “Qırım samooboronası” toqtattı, olar özüni nezaketli tuttı, amma maña binadan çıqmağa bermeyceklerini bildirdi. O ağır kün edi. Amma, men ava limanına kelgenimden soñ yarım saat keçmezden, anda büyük bir gruppa arqadaşlarımız - qırımtatarlar keldi, menim anda olğanımnı bilip, qorçalamağa keldiler”, - dedi Vakarçuk.
Onıñ aytqanına köre, o qırımtatarlarnıñ bu areketlerini “ebediyen” hatırlaycaq.
“Çoq şükür, meni qorçalamaq acet yoq edi. Amma o adiseni men ebediyen hatırlaycam. Olarnıñ destegi, olar anda kelip “Biz siznen” degenleri - men bunı iç bir vaqıt unutmam.. O zaman ukrain siyasiy milletniñ bar olğanını duydım”, - dep qoştı Vakarçuk.
“Sağlıqlaşqanda men: “Vse bude dobre” (“Er şey yahşı olacaq”) dep ayttım olarğa, olar ise: “İnşallah” dep cevaplandı. Bugün men de “İnşallah” deyim”, - dep çıqışını bitirdi yırcı.
Dekabrniñ 1-den 2-sinece Qırım evinde, "Qırım inciri” yarışını yekünlegen, “Qırım inciri” ilk ukrain-qırımtatar edebiy festivali keçirile.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
