Odessada Vera Holodnaya adına Art merkezinde ukrain arbiy mühbir Viktor Gromnıñ “Qırım. Hainliknen qırşavlanğan” filminiñ numayışı keçirildi.
Ukraina Arbiy Quvetlerniñ (AQ) Arbiy Deñiz Quvetleri (ADQ) bildirgeni kibi, kino numayışına bir qaç yüz seyirci keldi, olarnıñ arasında Odessa garnizonınıñ askerleri, Arbiy Deñiz Quvetleriniñ komandalığı, başqa arbiy adamlar, göñülliler, jurnalistlerm diniy vekiller ve yerli sakinler.
“Film, Qırım yarımadasınıñ işğali vaqtında 36 yalı mudafaa brigadası askerleriniñ ruisye işğalcilerine tirenüvini ikâye ete. Vaqialar 2014 senesi Anğara köyündeki arbiy qısımda keçe edi. Vesiqalı filmge unikal videolar ve vaqia iştirakçilerinen intervyü kirsetildi”, - denile beyanatta.
Bildirilgenine köre, merasimde çoq ilhaq vaqtında Qırım MC-nde hızmet etken askerler bulundı.
“Biz bu sınavdan menlik ile keçtik, biz olarnıñ Kreml kümüşlerine satılmadıq ve vatanğa sadıq qaldıq. Şimdi cemiyette Qırım adiselerinen bağlı çeşit-türlü fikirler bar, amma bu kibi vesiqalı filmler uydurmalardan vazgeçip, kerçekni açıqlamağa yardım ete”, - dedi 2014 senesi Qırım MC-nde yalı mudafaa brigadasınıñ yolbaşçılığını yapqan Ukraina AQ ADN komandanı admiral İğor Voronçeko.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
