Odesada sentâbr 14-ünde Ukraina Arbiy Deñiz Quvetleriniñ (ADQ) komandanlığı, arbiy gemilerniñ ekipajları, volontörlar, cemaatçılar ve tuvğanları, azat etilgen ukrain deñizcilerni qarşılay edi.
Ştabnıñ başı - Ukraina Arbiy Deñiz Quvetleriniñ komandanınıñ birinci müavini Andriy Tarasov, askerlerniñ tuvğan evlerine qaytuvnen hayırladı ve "duşman qarşısında cesaret, çıdam ve yeñilmemezlik"leri içün teşekkür etti.
Odessa volontörları, deñizcilerge timsaliy bahşış yaptı – olar Rusiye SİZOsında tutulğance, Odessa şeer şurasınıñ üzerinde yelpiregen Ukraina Arbiy Deñiz Quvetleriniñ bayrağını bağışladılar.
"Balalar, minnetdarlıqlarını köstermek içün, deñiz askerlerine timsaliy gemiçiklerni bağışladı, bu gemiçiklernen, deñizciler esirlikte olğance, ukrainler destek aktsiyalarını keçire edi", - denile beyanatta.
ADQ matbuat hızmeti, şimdi deñizciler raatlanacaq, soñ ise hızmetlerini devam etecek, dep bildirdi.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
