Odesada Rusiyeniñ gece darbesi neticesinde 22 insan yaralandı, vatandaş infrastrukturasınıñ "ciddiy yıquvları" bar, dep bildirdi şeerniñ arbiy memuriyet yolbaşçısı Serğiy Lısak.
"Bir qaç çoq daireli mesken ev ve mustaqil evler zarar kördi. Darbeler neticesinde büyük yanğınlar çıqtı. Şeerniñ merkezinde kilse binası zarar kördi. Ve daa – bala bağçası. Devlet fevqulâde vaziyetler hızmetiniñ hadimleri insanlarnı blok etilgen inşaatlardan qurtardı, aralarında bala bar. Bir çoq sakin tahliye etildi", – dep yazdı Lısak yanvarniñ 27-nde Telegramda.
Onıñ aytqanına köre, eñ zor vaziyet – Hacibey rayonında bir yerde: mesken evniñ bir qısmı yıqıldı. "İlk malümatqa köre, yıqıntılar tübünde insanlar ola bile. Qıdıruv-qurtaruv işleri bir daqqa toqtamay", – dep qayd etti vilâyetniñ arbiy memuriyet yolbaşçısı.
O, yaralanğan 22 insandan 14-üniñ yengil yaraları bar, ve yardım olarğa o yerde kösterildi.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.