Bundan da ğayrı, Odesanıñ skverlerinden birine de 1917 senesi ilân etilgen Qırım Halq Cumhuriyetiniñ ilk ükümet yolbaşçısı, qırımtatar milliy gimniniñ müellifi "Ant etkenmen" Noman Çelebicihannıñ adı berildi.
2014 senesi mart ayında Aqmescitniñ Marino mikrorayonınıñ 39 yaşındaki sakini, üç balanıñ babası Reşat Ametov evden çıqtı ve bir daa qaytmadı. Videokameralar onı Qırım ükümetiniñ binası ögündeki Lenin meydanında qayd etti. O, Qırımnıñ Rusiye ordusı tarafından ilhaqına qarşı bir kişilik narazılıq aktsiyasını keçirgen edi. Videoda "Qırım samooboronasınıñ" bir qaç vekili faalniñ ellerini büküp, onı maşnağa oturtqanı da qayd etilgen.
Eki afta soñ Ametovnıñ cesedini Qarasuvbazar rayonınıñ Zemlânıçnoye köyü yanında tarlada tapıldı. Erkekniñ cesedinde azap izleri bar edi, başı yapışqan lentanen sarılğan edi, yanında ise qırmaça bar edi. Ölüm sebebi, soñra belli olğanı kibi, közge yapılğan pıçaq yarası oldı. Ametovnı Aqmescitniñ "Abdal" mezarlığında defin ettiler. 2018 senesi Ametovğa Ukrayina Qaramanı unvanı berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
