Odesada fevralniñ 18-nde aqşam Rusiye ücüminiñ neticesinde 14 mektep, 13 bala bağçası ve 500-den ziyade evden ibaret mesken rayonı yarıqsız qaldı, dep bildirdi şeer yolbaşçısı Gennadiy Truhanov. Onıñ aytqanına köre, hastahanede yardım kösterilgen bir yaralanğan kişi aqqında belli.
"Şeerimizniñ eñ büyük rayonlarından biri — 250 biñden çoq adam, 500-den ziyade ev qızdıruv ve yarıqsız qaldı. Suv teminlevi ile bağlı vaziyet pek qıyın olğanını endi añlaymız, şunıñ içün vaziyet kerginleşmesin dep, suv çıqarmağa qarar aldıq", — dep ayttı Truhanov Telegram kanalında derc etken videoda.
O, şeerniñ Kıyiv rayonında fevralniñ 19-nda mekteplerde oqutuv ve bala bağçalarına baruv lâğu etile, dep qoştı.
Truhanovnıñ aytqanına köre, ücüm neticesinde bala poliklinikası ve bala bağçası zarar kördi.
"Çadırlarnı açacaqmız. Saba erte rayon memuriyeti zarar körgen dairelerniñ sakinlerinden arizalarnı qabul etecek. Kommunal hızmetleri ücümniñ aqibetlerini yoq ete. Fevralniñ 19-nda qızdıruv ve yarıq olmağan oquv yurtları vaziyet eyileşkenine qadar balalarnı qabul etmeycek. Qızdıruv noqtaları ve yeñilmezker noqtaları çalışacaq, mında qızanacaq, gadjetlerni yükleycek ve sıcaq çay içe bileceksiñiz", — dep yazdı şeer başı telegramda.
Elektrik ve sıcaq teminlevi ne vaqıt tiklene bilecegi aqqında aytqanda, Truhanov dedi ki, mütehassıslar aqibetlerni qıymet kese ve olarnı yoq etmek içün ne qadar vaqıt kerek olğanını belgiley.
Fevralniñ 18-nde aqşam Odesa vilâyetinde eki kere ava telükesi ilân etildi, içtimaiy ağlarda Odesada patlav sesleri aqqında yazılğan edi, soñra şeer yolbaşçısı şeerde yarıq ve qızdıruv problemleri aqqında bildirdi.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
