Odesada ilk yaz ayınıñ 10-na keçken gecesi Rusiye ücüminde elâk olğanlarnıñ sayısı ekige arttı, dep bildirdi vilâyetniñ arbiy memuriyetiniñ yolbaşçısı Oleğ Kiper.
Onıñ aytqanına köre, viraneler altında 1967 senesi doğğan erkekniñ cesedi tapılğan.
Yaralanğanlarnıñ sayısı da arttı. "Doquz insan yaralandı, dörtü orta ağır alda tibbiy müessiselerge alındı, digerleri ambulator tedaviylevni devam ete", — dep aytıla haberde.
OVA yolbaşçısı qayd etti ki, Rusiye dron ücümi neticesinde qan aqtaruv stantsiyası da zarar kördi. Daa evel o, bala doğuruv eviniñ bozulması ve acele tibbiy yardım stantsiyasınıñ dağıtılması aqqında yazğan edi.
Odesa vilâyet prokuraturası bildire ki, tahqiqat malümatına köre, ilk yaz ayınıñ 10-na keçken gecesi Rusiye silâlı quvetleri Odesağa eñ azından on dronnen ücüm etti.
Prokuraturanıñ malümatına köre, ücüm neticesinde 2 erkek elâk oldı, 5 qadın ve 3 erkek yaralandı.
Rusiye arbiyleri Ukrayina regionlarına ücüm etmek içün çeşit silânı sıq-sıq qullana.
Rusiye yolbaşçılığı, Rusiye ordusı tam kölemli cenk vaqtında Ukrayina şeerleri ve köyleriniñ grajdan infrastrukturalarına bilerek darbe endirgenini, sakinlerni öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
