Odesada Rusiye raketa darbesiniñ neticesinde 14 insan elâk oldı, olarnıñ arasında yerli sakinler, ekim ve qurtarıcı bar, dep bildirdi vilâyet arbiy memuriyetiniñ yolbaşçısı Oleğ Kiper.
Daa 46 insan, şu cümleden Fevqulâde vaziyetler Ukraina devlet hızmetiniñ yedi hadimi yaralandı.
Raketa telükesi monitoringiniñ vastaları evel ballistik raketalarnıñ açılğanını bildirgen edi, şeerde eñ azından eki patlav oldı. Fevqulâde vaziyetler devlet hızmetiniñ malümatına köre, birinci darbe neticesinde grajdan infrastruktura zarar kördi, yanğın çıqtı. Qurtarıcılar anda kelip, ateşni söndürmege, viranelerni temizlemege ve yaralanğanlarnı qıdırmağa başladılar. İşler keçirilgen vaqıtta Rusiye ordusı kene raketa darbesini endirdi.
İlk malümatqa köre, 20 insan zarar kördi, olardan beşi - qurtarıcılar.
Ücüm neticesinde 10 şahsiy ev, tehnikiy hızmet stantsiyası, alçaq basım gaz borusı ve eki yanğın-qurtaruv maşinası zarar kördi.
Martnıñ 15-ne keçken gecesi Rusiye ordusı Ukrayinağa "Şahed" tipinde 27 uçucısız uçaq ve sekiz raketa endirdi. Ukrayina arbiyleriniñ malümatına köre, yedi S-300/S-400 zenit idare etici raketaları Harkiv ve Donetsk vilâyetlerine, bir Х-59 aviatsiya raketi Poltava vilâyetine endirildi. Bütün 27 uçaq urıp tüşürildi, dep haber etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
