Avgustnıñ 17-ne keçer gecesi Odesadaki «Tokio Star» otelinde yanğın çıqtı. Qaza neticesinde 8 kişi elâk oldı, daa 10 insan yaralandı, dep bildire Ukraina Fevqulâde vaziyetler devlet hızmetiniñ matbuat hızmeti.
«Avgustnıñ 17-nde saat 1:34-te Fevqulâde vaziyetler devlet hızmetine Odesanıñ Vodoprovodnaya, 1a soqağındaki «Tokio Star» musafirhanesinde yanğın çıqqanı aqqında haber keldi. 4:32-de 10 metr kârelik meydanda yanğın söndürildi. Yanğında 8 kişi elâk oldı ve 10 insan yaralandı (olardan 7-si FVDH bölükleri tarafından qurtarıldı)», – dep aytıla haberde.
Adise yerinde Odesa vilâyetindeki FVDH Devlet idaresiniñ operativ gruppası çalışa. Hızmetniñ 65 hadimi ve 13 dane tehnika yanğın söndürilüvine celp etildi. Yanğın sebepleri ve elâk olğan ve yaralanğanlarnıñ şahsiyetleri aqqında tafsilâtlar şimdilik haber etilmey.
Şaatlar çıqarğan videoda yanğın büyükligi ve büyük tütün körüne. Ekimlerniñ elâk olğanlarnı ve yaralanğanlarnı acele yardım maşinalarına alıp ketkenleri körüne.
Odesadaki Tokio Star musafirhanesi – küçük odalı biznes ötelidir. Musafirhane şeerniñ demiryol vokzalı ve Privoz bazarından eki kvartal mesafesinde yerleşmekte. Otel binası – tamir etilgen eski tramvay deposıdır.
Aqyarda avgustnıñ 16-nda saba Çelüskintsev №10 soqağındaki mesken evde yanğın çıqtı.
Avgustnıñ 16-nda Bağçasaray rayonınıñ Pesçanoye qasabasında «Mandarin» bala lagerinde minder yanğanı içün 150 insan tahliye etildi.
