Odesada Rusiye ordusınıñ gece ücümleri neticesinde aqay ve apay elâk oldı: ekisi de 75 yaşında edi, dep bildirdi Çeçekniñ 24-nde saba şeerniñ arbiy memuriyetiniñ yolbaşçısı Sergey Lısak. Daa evel Fevqulâde vaziyetler devlet hızmeti ücüm neticesinde eki adam elâk oldı, dep bildirdi, amma kim olğanını aytmadı.
Bundan ğayrı, Lısaknıñ aytqanına köre, daa 15 insan yaralandı, sekiz kişi tibbiy müessiselerde buluna. Fevqulâde vaziyetler nazirliginde 14 zararlanğan kişi aqqında bildireler. Aynı malümatnı vilâyetniñ arbiy memuriyetiniñ yolbaşçısı Oleg Kiper de bildirdi. Onıñ aytqanına köre, ekisi hastahanege alındı.
Odesa OVA-sınıñ yolbaşçısı, Odesada Rusiye ücüminden mesken malleler ve ticaret gemisi zarar körgenini bildirdi
"Ücüm uçucısızlarnıñ uruluvı neticesinde eñ azından üç mesken evge zarar ketirildi. Daireler viran etildi, fasadlar kesildi, camlar qırıldı... Bundan da ğayrı, gece Sent-Kits ve Nevis bayrağı altında Büyük Odesanıñ limanlarından birine yol alğan ticaret gemisine dron urulğanı qayd etildi. Gemide yanğın çıqtı, ekipaj onı tez-tez yoq etti", — dedi Kipper.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.