Mayısnıñ 1-nden 3-ne qadar Odesada demiryol vokzalı qapalı olacaq, şeerden şeerge ketken trenlerniñ areketi lâğu etile, dep bildirdi cuma künü «Ukraina demiryolları» («Ukrzaliznıtsâ») matbuat hızmeti.
Odesa vilâyetine qatnağan ve Odesağa kirmegen trenler areketke devam ete.
Ukraina İç işler naziriniñ birinci muavini Yevgeniy Yeninniñ telemarafon yayınında aytqanına köre, Odesada «uzun bir» komendant saatı provokatsiyalarğa yol bermemek içün kirsetile.
«Odesa aqqında aytıp, 2014 senesi mayısnıñ 2-sini hatırlaymız, Rusiye «qoqlaları» ve hızmetçileriniñ areketleri bir çoq insannıñ ölümine sebep oldı. 8 yıldan soñ bu faciada «kimniñ kim olğanını» yahşı köremiz, Rusiye mahsus areketleri ve agenturanıñ areketlerinen bu adiselerniñ provokatsiyasını yaptı, Rusiye Federatsiyası bu mevzuda daima mühtekirlik yaptı, er yıl Odesada provokatsiya yaptı», – dep bildirdi Yenin.
Odesada mayısnıñ 1-nden saat 22:00-dan mayısnıñ 3-ü saat 05:00-ğa qadar komendant saatı ilân etildi.
Odesa vilâyetiniñ qalğan yerlerinde komendant saatı rejimi deñişmey – saat 22:00-dan saat 5:00-ğa qadar.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
