«Odesa vilâyetinde ücüm neticesinde barışıqsever insanlar yaşağan ve çalışqan eki qatlı bina yıqıldı. Adamlar yıqıntılar tübünde qaldı. Devlet fevqulâde vaziyetler hızmetiniñ qurtarıcıları dört adamnı qurtardı, ne yazıq ki, binanıñ yıqıntıları tübünde daa üç adam elâk oldı. Ölüler arasında 43 yaşında qadın, 22 yaşında oğlan ve 16 yaşında qız bar. Daa bir qadın yaralarından hastahanede vefat etti», – dep yazdı memur Telegramında.
Resmiy malümatqa köre, 10 insan yaralandı, doquz kişi hastahanege alındı, dördü ağır alda buluna. On insanğa adise yerinde psihologik yardım kösterildi.
Rusiye küçleri daima çeşit türlü silâ qullana – ücüm uçucısız, raketa, tüzetilgen ava bombaları, toplu ateş reaktiv sisteması – Ukrayina regionlarına ücüm eteler.
Rusiye reberligi Rusiye ordusı Ukrayina şeer ve köyleriniñ vatandaş infrastrukturasına maqsatlı ücümler yapqanını, sakinlerni öldürgenini ve hastahane, mektep, bala bağçaları, energetika ve suv teminatı obyektlerini yıqqanını inkâr ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayeti olaraq tasnif etip, belli maqsadları bar, dep qayd ete.
Birleşken Milletlerniñ malümatına köre, 2022 senesi fevralniñ 24-nden 2024 senesi avgustqa qadar Rusiyeniñ Ukrayinadaki istilâsı neticesinde eñ az 11 743 barışıqsever sakin (olarnıñ arasında 613 bala) öldürildi, 24 614 insan yaralandı – teşkilât bu adamlar aqqında malümatnı tasdıqlap oldı. Aynı vaqıtta, BM qayd ete ki, kerçek sayılar daa çoq ola bile, çünki barışıqsever sakinlerniñ qurbanları aqqında bazı malümatlar daa tasdıqlanmağan.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.