Arbiyler Odesa vilâyetiniñ cenübine qarşı ücümler dalğa-dalğa yapıldı, dep ayta. Rusiye orjusı uçucısızlarnı Qara deñizden uçurdı, Romaniya sıñırı boyunca da areket etti.
Vilâyetniñ arbiy memuriyet yolbaşçısı Odesa vilâyetine qarşı dron ücümi üç buçuq saat devam etti, ava mudafaa quvetleri 17 cihaznı urıp tüşürdi, dep bildirdi.
«Amma, ne yazıq ki, zarar körgen yerler bar. İzmail rayonınıñ bir qaç mesken yerinde anbar ve sanayı binaları, köy hocalıq tehnikası ve sanayı müessisesiniñ donatmaları zarar kördi. Tüşken parçalar neticesinde vatandaş obyektlerinde yanğın çıqtı. Saat yedige qadar yanğın söndürildi», – dep ayta Kiper.
Cenüp mudafaa quvetleri uçucısızlarnıñ gece ücümi aqibetleriniñ fotoresimlerini kösterdi.
Sentâbrniñ 4-nde saba Ukrayına Silâlı quvetleri Ava quvetleriniñ komandanlığı Dnipropetrovsk vilâyeti tarafına Rusiye ordusınıñ darbe uçucısızları areket ete, dep tenbiledi, ava telükesi ilân etildi. Vilâyette ava mudafaası altı dronnı urıp tüşürdi.
Rusiye ordusı sentâbrniñ 4-ne keçer gecesi Odesa vilâyetiniñ cenübine, hususan İzmail rayonına ücüm etti. Dalğa-dalğa uçurılğan «Şahed» dronları qullanıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
