Odesa vilâyet şurasınıñ deputatı vazifesindeki ilk qırımtatar Fevzi Mamutov köçip kelgenler içün bar olğan içtimaiy şaraitni eyilleştirmek ve sport saasını inkişaf ettirmek istegenini ayttı. Bunı o Azatlıq Radiosına bildirdi.
«Tarihte birinci olğanım, menimce, menim faziletim degil, taqdir öyledir. Priortetler, ilk nevbette, köçip kelgenler ile bağlı şimdiki vaziyet. Köçip kelgenler arasında meselerniñ çoqu bu öz evi, içtimaiy qoruv olmağanı», – dedi Mamutov.
Bundan ğayrı o, sportçular içün şaraitlerniñ eyilleştirilmesi ile oğraşacağını qayd etti.
«Ömrüm boyu sportçu olğanım içün, bu saada bir şeyler yapmaq kerek dep tüşünem. Şunıñ içün Odesa vilâyetinde bu saada bir şeyler yapmağa tıraşacağım. Er bir insannıñ tarihte qalmaq, bir isse qoşmaq istegi, maqsadı bar. Menim maqsadım – büyük qırımtatar merkezi. Bunıñ üzerinde men taqımım ile çalışam. Bunı devam etmek kerek», – dedi o.
Fevzi Mamutov, avgustnıñ 8-nde vefat etken Aleksandr Roytburd yerine "Avropa birdemligi" fırqasından Odesa vilâyet şurasınıñ deputatı oldı.
