Rusiye ordusı aprelniñ 8-nde Odesa vilâyetine kütleviy şekilde ücüm etti, dep haber ete Ukrayina fevqulâde vaziyetler devlet hızmeti.
Vilâyetniñ memuriyet yolbaşçısı Oleg Kiperniñ aytqanına köre, vatandaş ve liman infrastrukturası zarar kördiler. Anbar binası ve hocalıq inşaatı qısmen yıqıldılar. İlk malümatqa köre, yaralanğan olmadı.
Fevqulâde vaziyetler devlet hızmetiniñ hadimleri Harkiv vilâyetindeki vatandaş müessisesinde Rusiye darbesi neticesinde çıqqan yanğınnı söndürdi. Haberlerge köre, Merefa şeerinde cermay zavodı ücümge oğradı.
Odesa şeeriniñ arbiy memuriyet reberi Serğiy Lısak yaralanğan üç kişi aqqında bildirdi – ekisi hastahanede buluna, bir kişi evde tedaviylenecek.
Odesa vilâyeti, hususan Odesa, Rusiye dron ve raketa ordularınıñ ücümlerine muntazam sürette oğray.
Ukrayina sıñırındaki regionlarğa açılğan ateşte yaralanğanlar bar, Sumı vilâyetinde bir kişi elâk oldı. Bir qaç regionda ateşlerden elektrik problemleri peyda oldı. Elektrik söndürüv cedvelleri Kyivde de kirsetildi.
Ukrayina Silâlı quvteleri Ava küçleriniñ malümatına köre, Rusiye Ukrayinağa 176 uçucısıznen ücüm etti, 146-sı tüşürildi. 24 darbe dronınıñ ücümi qayd etildi, dep aytıla haberde.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.