Odesa şeer başı Gennadiy Truhanov Rusiyeniñ Ukrayinağa keniş mıqyaslı istilâsı sebebinden şeerniñ bir sıra soqaqlarınıñ adlarınıñ deñiştirilmesi kerekligini bildirdi.
"Er kün "qardaş halq" sözleri kettiçke daa ekiyüzlü ve kinli körüne. Odesanıñ bu cenkte öz ğayıpları bar. Biz ise, bugün bizim şeerimizni yer yüzünden yoq etmege tırışqan memleket ile iş körmege istemeymiz", - dedi o.
İlk nevbette, o, "Odesa tarihı ile asla bağlı olmağan" soqaqlarnıñ adlarını deñiştirmege teklif ete. Olarnıñ arasında Novomoskovskaya, Borodinskaya, Kurskaya, Voronejskaya, Çapayeva soqaqları.
"Odesa ve Ukrayinanıñ yañı tarihına bizni ğalebege yaqınlaştırğan adlar ve memleketler yazılmalılar, dep sayam. Odesada Müriupol Qaramanları soqağıya da Büyük Britaniya meydanı peyda olmalı. Ve elbette, ATO Askerleri meydanı yerinde büyük bir memorial yaratmalımız, anda ise Ukrayina oğrunda elâk olğan qaramanlarımıznıñ adları yazılacaq", - dep qayd etti şeer başı.
Aynı zamanda, Truhanovnıñ sözlerine köre, soqaqlarnıñ adlarınıñ deñiştirilmesi aqqında sonqi qararnı Odesa şeer şurasınıñ mebusları berecekler.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
